Həmişə belə olub və dünya durduqca, arzular bitib-tükənməyəcək. Yeni, 2016-nın astanasında dayanıb il ərzində olub-keçənləri xatırlayır, həyat planlarımızı sıralayırıq. Çünki hər birimizin Yeni ildən saysız-hesabsız gözləntiləri var. Arzular yaşayırsa, deməli, həyat davam edir.
...Ağır xərçəng xəstəliyinə düçar olmuş 17 yaşlı amerikalı gəncin arzuları ümmanda bir damladır. Uilyam Anton Olson adlı bu oğlan bir müddət Bakıda yaşayıb, təhsil alıb. Sonra xəstəliyi ilə əlaqədar ABŞ-a köçmək məcburiyyətində qalıb. Ağrılı günlər keçirən Uilyam həyat sevgisini itirməyib, xəstəxana çarpayısından qalxa bilməsə də, sonsuz arzularla yaşayır. Valideynləri də bunu duyub və ondan arzuları barədə soruşub. Uilyam belə cavab verib:
- Bakıda yaşadığımız binanın qarşısında kiçik bir xiyabanın salınmasını arzulayıram. Elə bir xiyaban ki, burda uşaqlar əylənsin, gənc dostlarım xoş günlər keçirsin, sevgililər görüş təyin etsin, sakinlər rahat istirahət etsin. Bakıda yaşayanda hər gün pəncərədən boylanıb bu boş əraziyə baxırdım, arzu da elə o zaman yarandı. Amma inanmıram ki, bu arzum reallaşa. Baxın, hətta gələcək parkın eskizlərini də hazırlamışam...
Amerikada “Make a wish” adlı bir xeyriyyə fondu var. Bu təşkilat Uilyam kimi çarəsiz xəstəliklərə düçar olmuş şəxslərin istəklərini, bəzən də son arzularını reallaşdırır. Fond əməkdaşları gəncin arzusundan xəbər tutan kimi ideyanı həyata keçirir: Bakıdakı həmin məhəllədə kiçik xiyaban salınır. Təəssüf ki, Uilyam xiyabanın açılışında iştirak edə bilməyib. O, bakılı dostlarına məktub ünvanlayıb:
“Əziz dostlar. Azərbaycanda yaşadığım illəri böyük məmnunluq və razılıq hissi ilə xatırlayıram. Bakını, bu nağıl şəhəri, onun qədim tarixini, mehriban və gülərüz insanlarını ürəkdən sevdim. Arzu edirəm ki, bu park bizim əbədi dostluq rəmzinə çevrilsin və insanlara xoş məramı xatırlatsın”.
Kaş Uilyam kimi gənclərin sayı dünyada çox olaydı və inanın ki, onların sayəsində Yer üzündə “müharibə”, “dəhşət”, “terror” kimi məfhumlar tamamilə unudulardı. Təəssüf ki...
Türk telekanallarının birində süjetə baxdım. Əyalətdə şəhid əsgərin cənazə törənindən reportaj hazırlanmışdı. Vilayətin valisi şəhid atasından arzusu barədə soruşdu. Məğrur ata valinin əlindən tutub kəndin içindən axan çayın kənarına gətirdi, sınıq-salxaq körpünü göstərib dedi:
- Bax, kəndin uşaqları hər gün bu uçuq körpüdən keçib məktəbə gedir. Tez-tez ayaqları sürüşüb yıxılır, əziyyət çəkirlər. Oğlumun arzusu idi ki, əsgəri xidmətini başa vurandan sonra gəlib öz hesabına bu körpünü təmir etdirsin. Allah nəsib etmədi. Vətən sağ olsun. Mənə və ailəmə dövlətdən heç nə lazım deyil. Şəhid balamın arzusunu həyata keçirin...
Bax belə! Gəlin, dekabrın son günü, bu bayram axşamı xoş niyyətləri qəlbimizdən, yaxınlarımızdan əsirgəməyək. Dünyanın min bir guşəsində yaşayan azərbaycanlıların növbəti ildə daha da həmrəy olmasını, Vətən sevgisi kimi ülvi ideyanın ətrafında daha sıx birləşməsini arzulayaq.
Niyyət edək ki, Yeni ildə işğal edilmiş torpaqlarımızdan yağıları birdəfəlik qovaq, düşmənə göz dağı çəkək. Ordumuz zəfər yürüşünü davam etdirsin. Qələbəmizi Şuşada bayram edək. Cıdır düzündə toy-büsat quraq, əl-ələ tutub yallı gedək.
Qoy Yeni il isti nəfəsi ilə sönmüş ocaqları şölələndirsin, el-obamıza, ailəmizə firavanlıq, xoş güzəran gətirsin. Analar oğulsuz, gəlinlər ərsiz, uşaqlar atasız qalmasın, həsrət bitsin.
Həyatın çətin sınaqlarından çıxmağı bacaraq, ümdə arzuları yaşadaq, insanlıq hisslərini, vicdanı, qüruru və ləyaqəti unutmayaq.
Və heç vaxt yaddan çıxartmayaq ki, xoş niyyətlər xoşbəxtlik, bəd niyyətlər bədbəxtlik gətirər.